خلينا متفقين إن السعادة هي شعور يبحث عنه كل الناس، لكنها مش نوع واحد، هناك فرق كبير جدًّا بين السعادة المؤقتة اللي بنحسها للحظات قصيرة، والسعادة الحقيقية اللي بتستمر لفترات طويلة
(وزي ما لاحظتوا أنا قولت فترة ولكنها مش مُمتدة لمدىٰ الحياة)
أولًا: خلينا نعرف إيه هي السعادة المؤقتة؟
دي لحظات فرح بتحصل بسبب أشياء خارجية، زي لما بتشتري هدوم جديدة، تليفون جديد، حاجة كان نفسك فيها مثلًا، أو النجاح في امتحان باجتيازه، أو حتى أكل وجبة بتحبها.
عادةً بتكون مرتبطة بحافز أو مكافأة، وبمجرد انتهاء الحافز، السعادة للأسف بتختفي، زي مثلًا لما بتتصفح مواقع التواصل الاجتماعي، ممكن يدينا شعور بالمتعة، لكنه بيكون لحظي، أو إنك تخرج مع صحابك المُقربين دَا ممكن يديك إحساس بالفرحة والضحك أثناء الخروجة اللطيفة دي، لكن بمجرد ما ترجع البيت، الإحساس ده ممكن يختفي، وترجع لحالتك العادية.
طيب عرفنا السعادة المؤقتة تعالى أقولك إيه هي السعادة الحقيقية:-
السعادة الحقيقية بتيجي من الداخل، لما تحس بالرضا، والراحة مع نفسك، ومع حياتك، بتكون مرتبطة بالمعنى والهدف، زي تحقيق أحلامك، أو إنك تساعد الآخرين، أو بناء علاقات قوية وصادقة، زي مثلًا إحساسك بالسعادة لما تكون محاط بأصدقائك، أو عيلتك اللي بتحبهم، وبيحبوك، الشعور بالفخر لما تحقق شيء صعب اشتغلت عليه لفترة طويلة.
إيه هو الفرق الجوهري بينهم؟
مصدر السعادة المؤقتة دايمًا بتعتمد على عوامل خارجية، لكن الحقيقية بتعتمد على إحساسك الداخلي.
أكيد الوقت الزمني للسعادة المؤقتة لحظي وسريع الزوال، لكن الحقيقية مستمر ومؤثر.
والسعادة المؤقتة سطحية بتلمس المشاعر بسرعة، أما الحقيقية عميقة وبتترك أثر طويل في حياتك.
إزاي نحقق السعادة الحقيقية؟
أولًا: خليك قريب من ربنا
حافظ على صلاتك، ودعائك، وابعد عن أي معصية تعصي ربنا.
ثانيًا: استثمر في نفسك
طور مهاراتك وابني أهداف واضحة وصريحة.
ثالثًا: حافظ على علاقات إيجابية
يعني ابعد عن الناس السامة.
رابعًا: خليك ممتن دايمًا
ركز على النعم اللي عندك بدل من التفكير في اللي ناقص.
خامسًا :ساعد الآخرين
المشاركة بتديك إحساس عميق بالرضا، وكمان متبخلش على أي حد بمعلومة.
وفــي النـهـايــة
السعادة المؤقتة مش سيئة، لكنها مش كفاية عشان تعيش حياة متوازنة، السعادة الحقيقية هي اللي بتخلق لحياتك معنى وتخليك تحس بالرضا عن نفسك وعن اللي حواليك.
وتـذكـروا دائــمًـا أن آلاف الأميال يـبـدأ بـ خطوة واحــدة.
والــسَّــلام لـك ولِـقـلـبـك.
كتابة/ آلاء شـــريـــف.
تدقيق/ ملك سعيد.
